綜合外媒報導，如果你十年前玩過 Facebook 一定見過嗰段「人鏈救狗」嘅超感人片段！當時喺哈薩克阿拉木圖嘅賽蘭水庫（Sayran reservoir），一隻小黑狗跌咗入洩洪道，一名後生仔衝落去救，結果因為斜坡太滑連人帶狗「 kick 」住咗。眼見一條人命一條狗命危在旦夕，一班素不相識嘅路人竟然「神同步」，手拉手搭起人鏈將佢哋拉返上岸。
事隔十年，呢段震撼全球 1,500 萬人嘅美談正式變咗做永恆嘅藝術地標！今年 3 月 18 日，一座重現當年「手拉手」瞬間嘅雕像喺水庫邊正式揭幕。雕像生動咁刻畫咗大家緊握手臂、齊心協力嘅樣，銘文寫住呢個設計係象徵「互助與團結」，提醒大家只要放低隔閡，無咩難關係過唔到嘅。最令市民拍手叫好嘅係，阿拉木圖市政府表示，呢個紀念計畫完全係由私人全額贊助，一分一毫公帑都無用過！呢座雕塑唔單止係為咗紀念嗰隻幸運嘅小黑狗，更加係表揚人類喺危難時刻展現出嚟嘅無私精神。