社運界，往往一涉及錢就好易出事，應該係話人一講到錢就好易出事。
所以一直以來，我都唔會接觸任何有錢銀來往嘅事，以前做公民記者又好，即使個台眾籌我都一個仙都無攞過，反而一直留意啲資金用係邊；依家做咗國難代言人都好，我都係義務，又係一個仙都無攞。
我依家賣稿唯生，僅足餬口，但一切都好透明既買賣關係，讀者課金支持我嘅工作。不過呢種高透明度，係某啲情況下真係做唔到，例如家長比零用錢比小朋友，特別係助養形式。咁耐以黎都有唔少人問過我點樣可以助養，我都一概不理，原因除了我唔想涉足任何金錢事，另一樣係「我點知你係人定鬼？我幫得你轉交咪即同自爆」
所以我真心唔明，點解咁多人可以攪所講嘅暗籌，出錢嘅、轉交嘅同收錢嘅，三方都變得好高危。而且點解可以咁多人，無拿拿彈出黎，又無乜知名度，咁多人會信。我睇一個人好簡單，睇往績。諗起近日好多行家都推緊個中文名係姓褚嘅非華裔傳媒人，我又係真心唔明啲人諗乜，條友以前係亞視做節目時講嘅野藍撚到爆，好似無人記得咁。
社運界真係要支援生活費嘅，有自己一直以來行之有效嘅方式。簡單講就係「掛羊頭賣狗肉」，錢收返黎係用好多唔同嘅正常途徑，例如開間公司做正當生意，之後將部份收入直接交比有需要嘅。又好似某啲知名基金，點解咁多人質疑盤數，都唔見有傳媒去爆啲乜，就係因為好多人都有共識。
諗起「Independence Day」，當中個總統終於去到51區時，問點解佢依家先知同問啲資金邊度黎， Julius 講左經典對白：「you didn’t think they actually spent ten thousand dollars for a hammer and thirty thousand for a toilet seat, did you?」