綜合外媒報導，由 Pearl Abyss 打造嘅開放世界大作《赤血沙漠》雖然上市成功吸納咗 200 萬玩家，但隨之而嚟嘅唔係讚美，而係一場「搵錯處」大賽。唔少細心嘅網民喺 X 同 Reddit 曬出截圖，指遊戲入面嘅壁畫同裝飾物極之唔自然：有一幅雙劍士畫作比例古怪，最離譜嘅係一幅馬匹圖畫，隻馬啲腳生到亂晒龍，完全係典型「AI 畫唔好肢體」嘅特徵！
面對排山倒海嘅質疑，Pearl Abyss 終於肯食「誠實豆沙包」。官方發表正式聲明，承認喺研發初期確實有用過生成式 AI 嚟整 2D 素材，原本諗住只係用嚟做「草稿」或者測試氛圍，諗住喺正式出街前換返晒做人手繪製嘅成品。點知「理想很豐滿，現實很骨感」，官方坦承有部分 AI 素材竟然「未經替換」就直接誤植入正式版，連佢哋自己都覺得唔符合內部標準。更令玩家介意嘅係，官方喺 Steam 同各個平台頁面都無標明有用過 AI，涉嫌隱瞞。Pearl Abyss 為呢次「透明度疏失」公開道歉，並承諾經已展開全公司 Asset 檢查，會盡快透過補丁（Patch）將啲「怪畫」換走。