綜合中媒報導，隨住中國人口老化加劇，加上墓地價格升到「貴過豪宅」，唔少家庭索性趁房市崩盤，買入平價公寓專門用嚟放親人骨灰。不過，呢種「骨灰房」現象由4 月 1 日起正式玩完，中國新修訂嘅《殯葬管理條例》今日生效，明文禁止將居民住宅用嚟安放骨灰！
點解大家寧願買樓都唔買地？原因好現實。根據調查，中國平均喪葬費高達 3.7 萬人民幣，佔年薪近五成，全球排第二貴！最令家屬覺得唔抵嘅係，公墓通常得 20 年使用權，而住宅物業就有 70 年產權。自從「房住不炒」政策出台，公寓價格大跌，唔少人覺得買個細單位供奉祖先，性價比高過買塊地。研究員吳欣怡指出，雖然新法例想遏止房地產商公開賣「骨灰房」，但好多宗族觀念強嘅家庭仲係會私下咁做，甚至當係一種長線資產。有趣嘅係，雖然傳統上好忌諱，但 2026 年唔少內地後生仔為咗平租，竟然表示唔介意隔籬係「骨灰房」，直言「窮鬼慘過撞鬼」。