綜合中媒報導，內地多個省份近期陸續重新喺國道同省道設立收費站，引發全國車主強烈反彈。其中山西省最為「狼胎」，宣佈喺短短 120 公里嘅路段內一口氣加設 3 個收費站，而且收費期長達 29 年 10 個月。內地早喺 2009 年已經取消咗養路費，改為徵收燃油稅，「買路錢」一向包含喺油價入面。但隨住地產市場轉差、地方債台高築，加上電動車普及令傳統燃油稅收入大減，地方政府入不敷支。為咗搵錢「保命」，安徽、甘肅、湖北、山西、江蘇等 7 個省份紛紛重開國道收費試點，新增收費站數量經已破百。
呢招「搶錢大法」令燃油車主最為受氣。有車主計算過，一年行 1.5 萬公里除咗要交重稅買貴油，依家行普通國道仲要額外嘔出幾千蚊通行費。最令佢哋心裡不平衡嘅係，同里程嘅電動車主完全唔使交油稅。雖然國家發改委舊年 10 月話會研討向電動車徵收「道路使用費」嚟平衡下，但相關政策暫時仲係「只聞樓梯響」。