中東戰火未平，朝鮮半島火藥味亦愈嚟愈濃！南韓聯合參謀本部14日偵測到北韓向東部海域一口氣連發 10 多枚彈道導彈。北韓官媒15日正式「開估」，證實試射咗 12 枚 600 毫米口徑嘅超大型多管火箭砲。領導人金正恩更帶同女兒金主愛（音譯）親自督師，兩父女再次以象徵最高權力嘅黑皮衣打扮閃亮登場。
據北韓官媒報導，金正恩對今次 12 枚火箭砲嘅精確打擊表現極之滿意。呢款火箭砲打擊範圍達到 420 公里，足以覆蓋全南韓甚至駐韓美軍基地。金正恩更語帶威脅咁話，呢款武器會令「敵人」坐立難安。軍事專家指出，北韓呢類大型火箭砲同彈道導彈嘅界線經已非常模糊，因為佢哋唔單止有制導功能，仲具備搭載核彈頭嘅能力，威脅性極大。相片中見到，年約 13 歲嘅「第一千金」金主愛全程陪同父親喺火箭發射車旁漫步，姿態淡定。