綜合外媒報導，南韓大邱市發生一宗令人極度不安嘅意外。一名就讀小學嘅女童，週一（16日）下午喺公園遊樂場玩耍期間，頸部突然被不明物體擊中受傷。隨後調查發現，罪魁禍首極大機會係來自 1.5 公里外軍方靶場嘅流彈！南韓軍方隨即宣佈，即時全面暫停所有步槍及手槍等小口徑武器嘅射擊訓練，直至查出真相為止。
雖然女童送院治療後傷勢並無大礙，經已平安出院，但事件經已引起當地社會極大恐慌。出事地點距離軍隊靶場約 1.5 公里，軍方證實當時正進行實彈演習。雖然該靶場設有防護牆，但軍方不排除有子彈「唔聽話」越過屏障誤傷平民。南韓軍方嘅安全紀錄再次受到質疑。2020 年全羅南道亦曾有高爾夫球球童被鄰近靶場嘅流彈擊中頭部；去年京畿道更有戰機「大意」將炸彈掉落村莊，導致近 30 人受傷。目前南韓軍方經已成立調查小組，核實女童傷勢係咪由演習子彈造成。