綜合外媒報導，各位自問有「博士級」實力嘅寶可夢大師留意喇！寶可夢公司（The Pokémon Company）近日大張旗鼓，宣佈由 3 月 3 日起公開招聘博士級人才。今次廠方出手極之闊綽，只要你持有博士學位，入職時無論被派到邊個部門，即刻先攞 100 萬日圓入職獎金；之後每年 3 月仲會加發 100 萬日圓「博士津貼」，福利簡直令人流晒口水。
官方表示，今次主要想搵理工學同農學領域嘅尖子。如果你對動植物生態有深厚研究，仲精通日文同英文，就更加係「贏在起跑線」。如果你係預計喺 2027 年先攞到學位嘅準博士，亦可以用應屆畢業生身份去申請。消息一出，唔少網民都笑言：「原來現實中真係會請人做『大木博士』！」外界分析，寶可夢公司咁積極搶博士，好可能同近年力推嘅「寶可夢生態」企劃有關。廠方喺 2025 年推出《寶可夢生態圖鑑》，特別搵嚟研究動物行為嘅學者，用學術角度去寫小精靈嘅生活習性，參考現實世界嘅動物設定，令成個「寶可夢世界」更加立體。睇嚟官方係想將呢套「權威設定」延伸去更多周邊同埋未來企劃，將大家心目中嘅遊戲世界變成真實嘅「生態體系」。