綜合中媒報導，如果你前排被嗰段「 7 隻狗逃離狗販魔爪、護送受傷德牧返家」嘅片感動到流馬尿，咁你要坐定喇。呢段喺抖音、微博同 X 狂掃近億點閱嘅「英雄片」，最近被證實全屬網民「腦補」！原來呢班狗根本無被捉過，亦唔係咩越獄英雄，真相竟然係一場「全村追女神」嘅大龍鳳。
據《封面新聞》同《城市晚報》查證，呢 7 隻狗其實係吉林某條村嘅「街坊」，全部都有主人，平時放養慣咗。點解會集體喺公路上行？唔係因為要救受傷同伴，而係因為嗰隻德國牧羊犬當時正值發情期！嗰隻被網民讚到天上有地下無、話佢「不離不棄」守護女神嘅哥基，其實只係其中一名「追求者」。最好笑係網民喺真相出嚟之前，經已自編自導自演到出神入化，甚至用 AI 生成咗幾款電影海報，連「驚險逃生」同「與主人重逢」嘅假畫面都整埋出嚟。 CNN 評論指，呢單嘢反映咗喺 AI 時代，假訊息傳播得快過火箭，加上依家世界太多災難，網民太渴求呢類「心靈雞湯」，結果集體中招。