想老咗唔好「記性差」甚至變失智？醫生經常叫人「多動腦」真係有根據！最新研究發現，長期保持閱讀、學外語或者捉棋等智力活動，可以有效增加「認知儲備」（Cognitive reserve），平均可以將阿茲海默症（Alzheimer’s）嘅發病時間延後約 5 年！
芝加哥拉什大學醫學中心（Rush University Medical Center）近期喺醫學權威期刊《神經學》發表報告，佢哋追蹤咗近 2,000 名長者足足 8 年。結果發現，經常搵野學、動吓腦筋嘅人，就算大腦開始出現退化特徵，佢哋嘅神經連結依然夠強，可以「頂得住」初期受損，令大腦維持運作。研究負責人札米特（Andrea Zammit）強調，重點唔係死做一樣嘢，而係要搵到自己有興趣又持之以恒嘅多元習慣，例如睇書、寫作、解謎，甚至係去博物館或者玩樂器，刺激大腦唔同嘅思考系統。
除咗「腦力激盪」，生理健康都係護腦關鍵。專家提醒，中年時期如果有高血壓，會令血管受損、腦部血流減少；而糖尿病控制得唔好，亦會引發大腦發炎。所以，除咗要活到老學到老，規律運動、控制血壓同埋有足夠睡眠都係「護腦大法」。另外，近期仲有研究發現，打過帶狀疱疹（生蛇）疫苗嘅人，失智風險相對較低。雖然暫時未有方法完全阻截老化，但透過生活習慣微調，絕對可以幫大腦「賺返 5 年」！