綜合中媒報導，近日河南商丘一間名叫「喜蝦客」嘅餐廳，因為一名食客抱住愛犬靠近餐具影相並 PO 上網，竟然引發一場全網「衛生大追緝」。雖然老闆多次解釋狗狗「連盤都無掂過」，但大陸網民依然唔收貨，鬧到餐廳體無完膚。最後，老闆忍無可忍，竟然當眾將店內約 600 套碗碟全部砸爛！
呢場風波起因只係一張看似溫馨嘅「人狗聚餐圖」。但網民紛紛質疑：「狗口水噴落盤度點算？」、「下次邊個敢用？」老闆透露，雖然當事顧客經已道歉，佢亦覺得對方無錯，但為咗平息民憤兼「自證清白」，佢決定採取最極端嘅行動，喺鏡頭前將全店價值約 9,000 元人民幣嘅餐具通通砸碎，變成一地碎片。除咗「自殘式」砸盤，老闆仲宣佈全店停業一日進行徹底消毒。雖然有人大讚老闆夠膊頭、夠爽快，但亦有唔少人覺得呢種做法太過浪費，甚至係被網絡暴力逼瘋嘅表現。