綜合外媒報導，日本搜尋二戰士兵遺骨嘅 NPO 組織「空援隊」今日（7 日）宣布，喺沖繩本島西原町嘅山林入面，發現咗約 40 至 50 具二戰軍人嘅遺骸。現場除咗搵到大約 10 個完整嘅頭蓋骨，仲發現咗日軍同美軍嘅手榴彈，顯示呢度曾經係一個近距離交火、極之慘烈嘅戰場。
「空援隊」 70 歲嘅專務理事倉田宇山表示，佢哋參考咗美軍當年嘅作戰紀錄，鎖定呢個曾經發生過激戰嘅地點，喺 4 月 3 日到 6 日動員咗 120 人進行大規模挖掘。倉田指出，佢哋從事遺骨收集工作 20 幾年，去過菲律賓等海外地區，但喺日本國內「同一個地點尋獲咁多遺骨」真係第一次見。由於現場完全無平民嘅生活用品，斷定呢批亡魂全部都係當年參與沖繩戰役嘅士兵。1945 年嘅沖繩戰役奪走咗超過 20 萬條人命，當地居民死亡率高達四分之一。 2026 年嘅今日，呢批遺骸嘅出現再次提醒世人戰爭嘅代價。目前手榴彈經已交由自衛隊回收處理。