法國地方選舉 15 號就開鑼，巴黎市長選戰打到入骨，點知連「腳底」都變成戰場！法國一間襪商睇準商機，推出印有 6 位主要候選人頭像嘅有機棉襪，仲大玩口號「投票係有用嘅，同著襪一樣！」，結果喺巴黎瑪黑區一炮而紅，變成另類「民調」。
呢啲「政客襪」每對賣 14 歐元，目前最受歡迎嘅係右翼共和黨嘅達提（Rachida Dati）同左翼社會黨嘅葛瑞格華（Emmanuel Grégoire）。不過，銷量高唔代表支持度高，事關法國人玩「抽水」真係有一手！有買家同傳媒講，因為自己有嚴重「腳臭」，所以專登買最憎嗰位候選人嘅襪返嚟著，「用腳投票」等佢日日聞臭味；亦有人為咗唔想表態，索性左腳著一隻、右腳著另一隻，玩埋「政治大和解」。
除咗巴黎，連里爾等城市都有份，其中極右派柯納芙（Sarah Knafo）仲有專屬「鮮黃色」款，原因係佢平時出鏡最鍾意著黃衫。品牌仲預告會推出總統馬克龍（Emmanuel Macron）嘅戴超頭像襪，甚至將佢嗰句被網民笑爆嘅英文口頭禪「For sure」印上襪。呢種法式政治嘲諷，唔單止反映當地年輕人對選戰嘅態度，更證明咗：喺政治面前，連對襪都要夠「抵死」先有市場。