綜合外媒報導，講起泰國代表，你可能第一時間諗起大象或者冬蔭功，但由舊年年底開始，你要記多五位「重量級主子」喇！泰國政府公關部（PRD）正式宣佈，將五種本土貓品種蘇帕拉克貓（Suphalak）、科拉特貓（Korat）、暹羅貓（Wichien-maat）、科恩加貓（Kornja）及白瑪瑙貓（Khao Manee）正式列為「寵物類國家象徵」。
泰國呢次「封貓為聖」唔係玩玩吓。呢五種貓幾個世紀以來都同泰國文化密不可分，無論係民間傳說定係日常生活，佢哋友善外向嘅個性同獨特外型，一向係泰國人嘅驕傲。除咗大家熟悉嘅暹羅貓，好似全身銀藍色嘅科拉特貓同眼珠好似寶石咁嘅白瑪瑙貓，依家通通都有「官方名份」，地位同大象、泰國鬥魚、甚至神話生物「那伽」平起平坐！點解要咁急住認證？原來係因為泰國國家身分委員會（NIC）擔心外國會「搶走」呢啲本土品種嘅所有權。為咗保障泰國嘅貓科文化傳統，加上國際社會對泰國貓嘅興趣越來越濃，官方認證除咗可以保住「祖權」，仲可以推動創意產業同經濟增長。