全球燃油價格因為中東戰事飆升，泰國近日更爆出令人噴飯的「買油變買水」羅生門！碧差汶府（Phetchabun）一名男子阿姆納特（Amnat）在網上發文警告，稱早前擲4 萬泰銖委託員工到考科縣（Bueng Samphan）一間小店掃貨備用，點知入落機器後，引擎竟然即刻「打柴」罷工。
阿姆納特檢查後發現，原本應該是汽油的容器內，竟然裝滿了清澈見底的「純水」！雖然換回正經汽油後機器重啟成功，未至於要報廢，但損失的 4 萬泰銖已經足以令人心痛。奇就奇在阿姆納特表示該店是「老字號」，以前幫襯開都無事，所以他最終決定唔報警、唔提告，只當自己「行衰運」。不少網民看完紛紛直呼：「咁都唔告？簡直係縱容黑店！」、「 4 萬銖買水？真係貴過飲名牌礦泉水！」
面對民間怨氣，泰國能源業務廳廳長沙拉吾趕緊出來「補鑊」，強調泰國目前的燃油儲備還夠用 101 天，現在的短缺只是物流問題，叫大家放心。不過，能源部長阿塔蓬（Attaphol Rerkpiboon）的一番話卻火上加油。面對 18 日油價再次上漲引發的怒火，他竟然叫民眾「透過減少用油來抵銷加價影響」。這番極其離地的「何不食肉糜」言論，隨即被泰國民眾鬧爆。