綜合外媒報導，大家印象中嘅海豚係咪好活潑、好得意？原來佢哋喺大海入面係出名嘅「頑童」！日本熊本縣天草市嘅「海中水族館 Sea Donuts」最近發生一單離奇案：一條野生小河豚唔小心「誤闖門戶」，溜入咗水族館嘅海豚活動區，結果慘被一班精力充沛嘅海豚當成「波」咁踢，驚嚇畫面喺網上瘋傳。
根據飼育員分享嘅照片，一隻海豚一臉得戚咁浮出水面，口入面竟然叼住一條全身「脹卜卜」、對眼突晒出嚟、寫滿絕望嘅河豚。飼養員透露，雖然活動區同大海有網隔開，但網眼擋唔住細小生物。當日佢去巡視訓練成果嗰陣，就見到呢隻調皮海豚正喺度瘋狂追逐兼玩弄呢條小河豚，完全當咗人哋係玩具球咁拋來拋去。
好彩飼養員及時下指令，叫海豚「交波」。經過檢查，呢條倒楣河豚竟然奇蹟地無受傷，最後被放生返大海。不過，BBC 紀錄片曾經揭露，海豚玩河豚可能唔止係「貪玩」咁簡單。部分科學家指出，海豚會故意戳、咬河豚，逼佢哋分泌神經毒素「河豚毒素」，海豚吸咗之後會進入一種好似「 High 咗」嘅迷幻狀態。換言之，呢條河豚喺海豚眼中，隨時係一粒「行行下嘅搖頭丸」。