顧客用消費卷而收手續費，八達通公司已取消某間藥鋪嘅商戶帳號。我諗起細個去黃金買電腦嘅年代，用信用卡比錢時，有啲商戶都係咁做。之後大個啲先知，原來信用卡公司都係唔比商戶咁做，所以後來出現大家見到嘅「現金價」，咁就無違反相關條款。

其實成件事最錯係派錢派到咁樣樣，係要用啲支付平台。大家都明係利益輸送比啲商家。不過最大鑊係有時限，即係全港商戶都深知呢筆錢，唔會收得埋。

唔似得隔夜餸，你留到第日都可以食，要你即晚食哂佢，就算飽到嘔，都無得留低。咁好自然，有部分商戶，係消費卷呢段時間，取消原本在消費低迷之下嘅減價，甚至進取啲會加價。大家半年後就應該會由通脹反應實際情況。

而最好笑係啲錢原本就係香港人嘅，大家有份比稅架，但還富於民時不止利益輸送比支付平台，更要全港於限期內消費去推高返消費指數，改善經濟數字，塑造香港經濟復甦嘅現象，而不適代價而推高通帳。

諗起一本書，Peter Schiff嘅How an economy grows and why it crashes。當中提到通貨膨脹。有咁樣嘅一句「通脹來自於貨幣供應擴張」，正正係依家香港嘅情況。但呢筆消費卷過後帶來嘅通脹，香港人嘅人工又追唔追得上呢？以過去幾年嘅薪金調查，大多港人嘅加薪幅度都係追唔到通帳。

所以我係未領取消費卷嘅，坦白，我都仲諗緊可以點自無咁「中計」，最可取嘅方法，應該係將消費卷用於最基本嘅車費同食飯等。咁政權嘅如意數盤會打得無咁響，而且相對無咁激刺到通脹。