綜合外媒報導，南半球超長命嘅五級強烈氣旋「納雷爾（Narelle）」，喺橫跨大半個澳洲大陸、三次登陸之後，竟然喺西澳引發咗一場震撼全球嘅「血色風暴」。當時天空完全被吞噬，呈現出一種極之唔自然嘅深紅色同橙色光芒，畫面詭異到令人心寒。
點解會變紅色？澳洲氣象部門解釋，西澳北部不嬲以富含鐵質嘅「紅土」聞名。呢啲土經過幾百萬年氧化，本身就係鏽紅色。當「納雷爾」以五級氣旋嘅強風橫掃陸地，將大量含氧化鐵嘅沙塵捲到高空，形成咗一面巨型嘅紅色沙塵牆。呢啲微粒會散射光線，搞到大白天都好似滲咗血咁紅。
現場情況極之惡劣，除咗能見度近乎零之外，空氣入面全部都係鐵鏽味嘅沙塵，唔少居民反映出現呼吸困難。呢場「血色末日」嘅片喺 X 同 Instagram 瘋傳，全球網民都睇到目瞪口呆。有人留言：「 2026 年到底發生咩事？教宗開火、美金簽名、而家連個天都變紅埋？」、「呢種紅真係好恐怖，好似世界末日前兆咁」。