綜合外媒報導，清酒名牌「獺祭」今次真係「離晒譜」，唔係話佢產品質量，而係佢哋竟然將釀酒廠搬咗去太空！獺祭去年 10 月委託 H3 火箭，將釀酒材料送去國際太空站（ISS），展開名為「Moon Project」嘅壯舉。經過一段時間嘅宇宙漫遊，呢批珍貴嘅「太空酒醪」終於喺 13 號返抵位於山口縣嘅總部，身價仲即時飆升到一個令人睇到眼定定嘅水平。
呢個計畫最瘋狂嘅地方，係喺太空站入面模擬月球重力嚟進行發酵實驗。獺祭社長櫻井一宏表示，呢個研究係為咗未來人類移居月球做準備，希望到時大家喺月球生活都可以飲到靚酒。呢批米、酒麴同酵母喺太空發酵咗兩星期，全程由地球專家遠程監控，依家返到嚟日本，要由社長親自戴手套開箱「驗屍」，預計會喺呢個月 24 號正式解凍同壓榨。講到大家最關心嘅價錢，呢支「宇宙獺祭」每 100 毫升定價高達 1 億 1,000 萬日圓，換雖然價錢貴到可以買層樓，但獺祭方面透露，目前經已搵到「豪客」買家預訂咗。每飲一啖，基本上就係飲緊幾架房車落肚。睇嚟呢份「科技浪漫」，真係要有返咁上下身家先可以品嚐得到。