綜合外媒報導，瑞典國家犯罪防治委員會（BRA） 31 號公布咗 2025 年年度數據，舊年全瑞典嘅謀殺同過失殺人受害人數跌到得返 84 人，不單止比 2024 年嘅 92 人再少咗，更係由 2020 年高位 124 人大幅回落，創下咗 2012 年以嚟嘅最低紀錄！
點解瑞典可以喺短短幾年內「撥亂反正」？全靠 2022 年上台嘅右翼政府推行一系列「重典」。佢哋引入咗爭議性極大嘅「安全區」政策，賦予警方喺無具體嫌疑嘅情況下都可以擴大搜索權，加上增加電子監控同加重刑罰，令警方可以更有效咁沒收幫派資產，直接「斷佢哋糧」。雖然舊年 2 月奧勒布羅市（Örebro）發生過一單慘烈嘅 11 死校園槍擊，佔咗全年槍枝暴力嘅四分之一，但整體趨勢依然係向好。