綜合外媒報導，科威特民航局正式證實，科威特國際機場遭到伊朗及其武裝分子嘅無人機「公然襲擊」！現場機場燃料罐被擊中引發熊熊大火，雖然暫時無人傷亡，但呢種直接攻擊民航設施嘅行為，標誌住伊朗對美國盟友嘅報復行動經已「全面升級」。
更令人擔心嘅係，呢場火唔只燒到機場。尋日一艘掛住科威特旗、原本準備飛往中國青島港嘅大型油輪「Al-Salmi」，亦喺杜拜港被炸到起火。船隻追蹤網站顯示，呢架船原本預計 20 號到青島，點知未出波斯灣就中招。呢單野唔單止關美國事，連中國嘅能源供應鏈都被捲入咗呢個「火藥桶」。
與此同時，巴林同卡達都唔好過。巴林官方指控伊朗侵略，導致當地商業設施起火；而英國海事貿易行動部門（UKMTO）亦收到報告，指喺多哈以北 31 公里處有油輪被「不明物體」擊中左舷。雖然英國佬仲查緊係邊個做，但明眼人都知，自從 2 月 28 號美以開戰以嚟，伊朗經已徹底豁出去，要拉埋全中東落水。