綜合外媒報導，美東時間 22 日深夜，一架隸屬加拿大快運航空（Air Canada Express）嘅 CRJ-900 客機，喺降落期間竟然同 紐約拉瓜迪亞機場（LaGuardia Airport） 跑道上嘅消防車發生激烈碰撞！現場照片慘不忍睹，客機機頭被撞到向上抬升、嚴重損毀，不幸造成機長同副機長當場殉職，另外仲有 41 人受傷送院。
最令人心碎嘅係隨後曝光嘅塔台錄音。當時機場正處理緊另一單緊急事故，代號「1 號車」嘅消防車獲准橫越 4 號跑道。點知同一時間，JAZZ 646 號客機正準備降落，塔台管制員發現出事，喺無線電瘋狂大嗌：「1 號車，停下！停下！停下！」可惜大雨導致視線極差，短短幾秒鐘後，巨響傳來，一切已經太遲。目前美國聯邦航空總署（FAA）同國家運輸安全委員會（NTSB）經已介入調查，初步懷疑大雨影響視線同塔台多線作業壓力係釀成悲劇嘅主因。拉瓜迪亞機場目前部分關閉，全美航空交通大受影響。