綜合外媒報導，美國佛蒙特州謝爾本（Shelburne）近日一隻浣熊懷疑因為太想食花生醬，竟然將成個頭鑽入棄置嘅花生醬罐入面，點知入得去出唔返嚟，被迫戴住呢個「透明頭盔」喺街上遊蕩，最後仲因為驚慌而爬咗上 7.6 米（約 25 英尺）高嘅樹上，場面極度尷尬。
最先發現呢位「太空人」嘅係當地水務局嘅職員，佢見到浣熊頂住個樽喺高空進退兩難，唯有報警求助。謝爾本消防局接報後不敢怠慢，派出消防員架起長梯，小心翼翼爬上高處。消防員最終利用專業套索，喺唔傷害浣熊嘅情況下順利將花生醬樽取下，重獲自由嘅浣熊隨即「鬆一口氣」逃回森林。消防局事後喺 IG 發帖文打趣表示，佢哋終於幫浣熊「恢復咗應有嘅尊嚴」，但同時亦嚴肅呼籲大眾：呢類廢棄容器對野生動物嚟講係致命陷阱。如果大家唔妥善處理垃圾，或者喺掉樽之前無先清洗乾淨，好容易會令呢類貪食嘅小動物受害。