綜合外媒報導，一向以「情緒穩定」著稱、被網民封為職場偶像嘅水豚（Capybara），竟然都有爆發嘅一日！英國漢普郡馬韋爾動物園（Marwell Zoo）最近發生一宗令人哭笑不得嘅失蹤案。兩隻啱啱喺 16 號先「入職」嘅新成員——雌性水豚「森巴」（Samba）同「探戈」（Tango），竟然喺第二日（17 號）就集體「曠工」越獄，令園方大感頭痛。
雖然工作人員反應迅速，好快就喺動物園附近搵返「探戈」，但另一位主角「森巴」就似乎非常有主見，至今依然失蹤。據外媒報導，18 號晚曾經有村民喺附近嘅奧斯爾伯里（Owslebury）目擊到「森巴」嘅蹤影，可惜等動物園員工趕到嗰陣，呢位「逃犯」經已消聲匿跡，繼續佢嘅大自然大冒險。園方強調，水豚性格超級溫馴，絕對唔會對居民造成威脅，亦唔會主動攻擊人。不過，由於水豚體型唔算細，加上可能受驚，園方特別呼籲民眾：如果喺街頭偶遇呢位「佛系逃犯」，請保持距離「眼看手勿動」，千祈唔好試圖自己捕捉，應該第一時間打電話畀動物園等專業人士處理。