綜合外媒報導，掌握全球 20% 石油及天然氣貿易嘅荷姆茲海峽（Strait of Hormuz），近日因為伊朗威脅而受阻，引發全球能源危機。估唔到受害者名單入面，竟然包括咗以「山葵烤牛肉」（わさビーフ）口味聞名嘅日本薯片大廠「山芳製菓」（Yamayoshi）。
山芳製菓今日發出緊急聲明，語氣極其沉重咁表示，受到荷姆茲海峽封鎖影響，公司無法從供應商嗰度獲得足夠嘅「重油」嚟維持工廠鍋爐運作。因為採購極其困難，廠方無奈宣佈，即日起不得不暫時停止所有工廠運作，部分產品（特別係王牌口味山葵烤牛肉）將會延遲甚至停止出貨。總公司設喺埼玉縣、創立於 1953 年嘅山芳製菓，最經典嘅莫過於 1987 年推出、包裝上有隻牛牛嘅「山葵烤牛肉」薯片。呢款薯片係唔少香港人嘅「心頭好」，依家工廠停擺，復工時間表仲要係「無明確時間點」，聲明最後提到，一旦確定復工時程會即時喺官網公佈。