美國首都華盛頓特區23 日兩名槍手竟然喺東南部地區「埋伏」，狙擊一輛正參與調查、無標記嘅美國公園警察（USPP）警車。當時車內一名資深警官正專心工作，點知突然遭到至少兩名槍手「連環掃射」，警官上身中彈，情況一度極度危急！
美國公園警察局局長布雷希特（Scott Brecht）指，呢位受傷警官展現咗驚人嘅鬥志，中彈後仲可以忍痛繼續揸車，直到靠邊停低接受急救。隨後軍方更出動直升機將佢緊急送往醫院搶救。好彩最新消息指，呢位資深警員目前經已脫離生命危險，真係大難不死。大都會警察局代理局長卡羅爾（Jeff Carroll）表示，當時警方完全無還擊，兩名槍手行兇後隨即逃離現場。目前華府警方經已進入「全城戒備」狀態，全力搜捕兩名逃犯，並大聲疾呼要求附近可能影到案發過程嘅居民「挺身而出」，提供片段緝兇。