綜合外媒報導，菲律賓總統小馬可斯正式簽署行政命令，宣布全國進入「國家能源緊急狀態」，以應對隨時爆發嘅能源供應中斷同油價飆升風險。小馬可斯直言中東衝突經已威脅到菲律賓嘅能源安全。進入緊急狀態後，政府可以喺現行法律下採取更加「快狠準」嘅協調措施，唔單止要保住電力，仲要確保油料、食品、藥物同農產品等民生必需品唔會出現混亂或斷供。
菲律賓能源部長加林（Sharon Garin）喺記者會上更拋出一個令國民心驚嘅數據：按目前消耗量計算，菲律賓嘅燃料供應大約只係夠支撐 45 日。雖然政府經已向東南亞鄰國緊急採購咗 100 萬桶原油，但加林坦言，後續嘅訂單充滿咗「極大不確定性」，隨時會出現有錢買唔到貨嘅情況。