綜合中媒報導，湖北武漢近日一名趙先生同朋友喺一間兩層高嘅牛蛙店 1 樓食飯，點知頭頂天花板突然「砰」一聲破裂，一隻穿住長褲嘅左腳竟然直接穿透天花，懸掛喺半空係咁郁，嚇到趙先生一行人冷汗直流，連牛蛙都唔敢再食。
事發時 2 樓正喺度裝修，雖然 1 樓照常營業，但當時全場只有趙先生一桌客人。店家見狀隨即緊急疏散食客，場面極度尷尬。餐廳業者22 日受訪時解釋，當時係一名服務員喺 2 樓工作時，唔小心踏穿咗薄薄嘅天花板，搞到成條腿卡住咗喺個窿度。好彩呢位「天降服務員」並無大礙，只係受咗輕傷，休息一日之後今日經已可以正常返工。