綜合中媒報導，河南周口一名玩具店老闆聶鵬立， 2020 年因為販售高度仿真嘅水彈槍，點知因為買家寄返嚟維修嗰陣被快遞公司報警，結果捲入咗一場長達兩年嘅「非法買賣槍支」官司。佢同拍檔劉新被警方刑事拘留咗足足 279 日，人生最自由嘅日子就咁喺鐵窗入面過咗。
成件事嘅爭議點喺於「槍口比動能」。警方當時查獲 98 支疑似槍支，其中 10 支被鑑定超過咗 1.8J/cm² 嘅標準。一審原本判咗佢「三年、緩刑四年」，但去到 2025 年 3 月，武威中級法院二審認為事實不清、證據不足，發回重審。最後檢方喺 2025 年 10 月正式撤訴，還返聶鵬立一個清白。
雖然清白咗，但代價極之沉重。法院裁定人身自由賠償金加埋精神撫慰金，總共大約 16 萬人民幣。但聶鵬立苦笑話，佢為咗打呢場官司經已使咗超過 40 萬！最令佢介懷嘅係，法院駁回咗佢要求「公開道歉」同「恢復名譽」嘅請求。佢表示雖然無奈，但經已無力再爭落去，「接受結果」算係為呢段黑色人生畫上句號。