綜合外媒報導，一向俾人覺得係雜音嘅雀仔叫聲，原來同人類語言一樣有字義。美國加州大學柏克萊分校學者艾利（Julie Elie）花咗超過15年時間，專門研究極度鍾意「吹水」嘅斑胸草雀。佢利用AI機械學習技術，成功喺大批鳥鳴數據之中，整理出10幾種代表唔同意思嘅核心叫聲，包括求偶、社交、發出警報同埋表達痛苦等精細功能。
研究團隊仲做咗個撳掣攞配給嘅實驗，發現班雀仔聽到無嘢食嘅叫聲會即刻飛走，舉動好似現代人刷短影音一睇到無聊片就即刻跣走一樣。最驚人嘅係，研究發現雀仔如果搞錯叫聲，通常係混淆咗「意思相近」嘅字眼，而唔係「聽錯聲音」，證明佢哋大腦入面真係明個詞彙代表咩。呢項重大突破令艾利榮獲2026年「科勒-杜立德雙向跨物種溝通獎」兼得到10萬美元獎金。專家更預測，隨住AI爆發式成長，人類極有可能喺2030年之前徹底破解密碼，實現同動物嘅雙向溝通。