綜合外媒報導，91歲嘅中國福建老人家楊炳林，唔單止係金氏世界紀錄最高齡嘅遊戲實況主，最近仲完成咗一項令無數「小朋友」汗顏嘅壯舉，佢喺完全唔睇網路攻略嘅情況下，靠住一對手、一枝筆，親手寫下戰略筆記，成功通關咗 2 月底先出爐嘅《生化危機9 安魂曲》！
楊阿公由 1996 年退休開始打機， 30 年嚟由 PS1 玩到 PS5，收藏超過 500 款遊戲。佢最令人佩服嘅係「打機態度」，佢堅持唔去網上抄嗰啲「 A 點去 B 點」嘅快餐攻略，而係要透過手寫紀錄搞清楚劇情嘅來龍去脈。佢話咁樣先至係真正享受遊戲開發團隊嘅心血，目前仲經已展開緊「二週目」挑戰！
傾到啱啱通關嘅《 生化危機9 9》，楊阿公對主角Leon同Grace嘅「老少配」讚不絕口。佢感觸咁話：「咩叫勇敢？唔係唔驚，係驚都要向前行。」佢覺得打咗 30 年喪屍嘅Leon，同第一次落場嘅 Grace ，展現咗一種「只要有人陪，再難都扛得過」嘅精神。佢仲笑笑口話，只要呢個系列繼續出，佢就會繼續玩，「 30 年都過嚟咗，再等幾年無所謂！」