綜合中媒報導，大家平時搵資料或者買嘢，係咪愈嚟愈依賴問 AI 大模型？小心！你得到嘅「誠意推薦」可能係人用錢買返嚟嘅假象。內地媒體喺年度「315」晚會踢爆，隨住生成式 AI 普及，竟然催生出一條名為 GEO（Generative Engine Optimization） 的黑色產業鏈，專門「教壞」AI 講大話。
所謂 GEO，簡單嚟講就係 「AI 版嘅 SEO」。服務商聲稱，只要客仔畀錢（最平只需約 40 蚊港幣），佢哋就可以透過大量發布虛假文章，構建一片「假資訊大海」。當 AI 喺網絡抓取數據（即係「投餵」）嘅時候，就會不知不覺吸收咗呢啲垃圾內容。結果，當你問 AI「邊款手環好用？」或者「邊間餐廳正？」嘅時候，AI 就會將呢啲付費客戶嘅產品當成「標準答案」優先推薦。
有業內人士進行測試，虛構咗一款「完全唔存在」嘅智能手環，再用 GEO 系統發布大量宣傳稿。點知幾日之後，問幾款主流 AI 模型，對方竟然真係推薦呢款「幻影產品」，仲排喺推薦榜前列！呢種行為喺業界被形容為「投毒」，利用大數據嘅漏洞嚟誤導消費者。專家李富民指出，呢種手法本質上係一種極其隱蔽嘅「虛假宣傳」。佢唔單止侵犯咗消費者嘅知情權，仲搞亂咗正常嘅演算法秩序同市場競爭。