綜合外媒報導，馬斯克嘅野心真係無底線！佢今日正式宣布啟動最新大計「Terafab」，準備喺德州奧斯汀附近興建一座超級半導體製造廠。雖然馬斯克完全無造晶片嘅經驗，但佢一開口就話要生產每年相當於 1TW（太瓦） 運算能力嘅晶片。外媒 Wccftech 直言，呢個產能規模簡直超越人類想像。
呢個計劃將由 Tesla 同 SpaceX 聯手營運，據傳初期投資金額高達 200 億至 250 億美金。馬斯克好老實咁講，雖然好感謝台積電、三星同美光（Micron）等現有供應商，但佢哋擴產嘅速度「遠低於我哋想要嘅」，因為 Tesla 同 SpaceX 未來對算力嘅需求將會係「天文數字」，所以佢決定自己動手，由設計、製造到測試一條龍搞掂。馬斯克更將呢個計劃提升到「星際層次」，指 Terafab 最終目標係要協助人類成為利用恆星資源嘅「銀河文明」。佢希望晶片可以支援地球每年 100 至 200GW 嘅算力，而喺太空更要達到 1TW。雖然佢仲未公布具體投產時間表，但呢個消息經已令全球科技界震驚。