綜合外媒報導，德國柏林附近克萊斯托（Klaistow）農場近日舉行年度盛事第22屆南瓜節（Kürbis Festival），今年主題係「女性力量」（Women Power），主辦單位用咗超過10萬顆五顏六色嘅南瓜，砌出多座令人嘆為觀止嘅巨型女性雕塑，向世界各地傑出女性致敬。
今年一共有15座大型南瓜雕像登場，當中包括墨西哥傳奇畫家芙烈達卡蘿（Frida Kahlo）、瑞典經典角色Pippi Longstocking、以及古埃及艷后克麗奧佩脫拉（Cleopatra），全部都由真南瓜砌成，現場氣氛又夢幻又歡樂。
農場負責人溫克爾曼（Antje Winkelmann）笑言：「之前幾年都玩過古羅馬、運動等主題，今年係時候畀女性做主角啦！」團隊經過一輪精挑細選，決定以「視覺上最吸睛」為原則，結果造就出多位「南瓜女神」。現場最搶眼之一，莫過於卡通《 Simpson 》嘅Marge Simpson，佢標誌性嘅藍色高聳頭髮，用數十顆冬南瓜堆疊而成，效果相當鬼馬。