綜合外媒報導，遊戲界近年掀起「政治正確」及角色外型美醜嘅激烈爭議。經典大作《戰神》（God of War）系列創作者 David Jaffe，近日就喺社群平台 X（前稱 Twitter）火上加油，公開批評嗰啲因為女主角唔夠性感而揚言抵制遊戲嘅玩家係「無藥可救」（Humanity is doomed），隨即引發網民排山倒海嘅反擊。
事件起因係 David Jaffe 轉發咗一篇關於 Naughty Dog（頑皮狗）新作《星際：異端先知》（Intergalactic: The Heretic Prophet）嘅文章。原文中有玩家用 AI 修改咗女主角嘅外貌，令其變得更符合傳統「性感」標準。Jaffe 表示，雖然自己都鍾意睇性感美女，但如果玩家純粹因為「女角唔夠正」，就拒絕遊玩頂尖團隊開發嘅全新 IP，佢認為呢種心態簡直係人類嘅悲劇。
呢番言論隨即激嬲機迷。唔少網民反駁，遊戲本身係商品，角色有無吸引力（Charisma）絕對係購買因素之一，「第一眼都睇唔順眼，點解要畀錢買？」更有網民直指，現時西方開發商似乎刻意「醜化」女性，大家唔係要求主角個個係超模，但都唔好「整到咁難睇」。面對網民質疑，Jaffe 亦不甘示弱反擊。佢透露當年設計 Kratos 時，團隊係故意整斷角色嘅鼻樑，目的就係要佢望落唔似一個帥氣嘅偶像明星，而係一個充滿殺氣、真實嘅戰士。佢強調，除非劇情需要，否則喺寫實風格嘅作品中，佢會選擇「有吸引力但符合現實」嘅外觀，而唔係單純追求性感。