綜合外媒報導，英國版權法改革箭在弦上，但就引發一場創意界嘅「大地震」！包括諾貝爾文學獎得主石黑一雄（Kazuo Ishiguro）、歷史小說家格雷戈里（Philippa Gregory）同奧斯曼（Richard Osman）在內嘅近萬名大作家，近日聯合出版一本名叫《別盜用這本書》（Don’t Steal This Book）嘅奇書。最震撼嘅係，呢本書除咗過萬位作家嘅聯署名單之外，全書內容竟然係「完全空白」！作家們用呢本「無字天書」向科技公司開火，諷刺佢哋喺無授權、無畀錢嘅情況下，擅自用人哋嘅畢生心血嚟訓練 AI 模型，實行「零成本」掠奪。
引爆今次怒火嘅導火線，係英國政府擬於 3 月 18 日提交嘅版權法改革方案。當中最令業界「火起」嘅係一項「Opt-out」制度：除非原創者主動開聲話「拒絕授權」，否則 AI 公司就可以「奉旨」任攞有版權嘅作品。業界更擔心政府會以「商業研究」為名搞版權豁免，變相為科技巨頭開後門，等佢哋可以合法規避法律責任。
面對科技巨頭聲稱放寬限制可以「搞好經濟」，有顧問公司直接踢爆呢種講法係「幻想經濟學」。研究指出，依家阻礙 AI 發展嘅係電力同人才，根本唔關版權事，削弱版權法只會對英國引以為傲嘅文化產業造成「毀滅性打擊」。樂壇巨星艾爾頓強（Elton John）亦睇唔過眼，痛批政府向科技公司傾斜嘅立場係「徹底失敗」。目前呢場抗議行動經已喺倫敦書展遍地開花，有非營利機構正推動「集體授權」，要求 AI 訓練必須合法攞牌兼畀版權費。面對排山倒海嘅民意同壓力，據聞英國內閣正考慮「褪軚」延後決定。