綜合外媒報導，英國Castle Gresley發生一宗令人啼笑皆非嘅「變色」奇案。42 歲建築工人湯米（Tommy Lynch）日前一覺醒來，赫然發現自己由頭到腳變成深藍色，十足電影《阿凡達》主角咁款。佢個護理師老友見到呢個「藍人」模樣，驚佢嚴重缺氧，嚇到叫佢即刻去急症室求救。
湯米回憶當時醫護人員見到佢「好似見鬼咁」，個個表情驚恐，直言從來未見過人可以藍得咁緊要。醫生隨即進入「戰鬥狀態」，第一時間幫佢戴上氧氣面罩急救。點知，當醫生準備幫佢抽血、用酒精棉片擦拭佢手臂時，尷尬嘅一幕發生咗，棉花竟然被染成藍色。醫生抹多兩抹，發現湯米層藍色皮膚竟然「抹得甩」。原來，呢場驚魂記嘅罪魁禍首係一對新床單，湯米表示，前一晚因為返工太攰，未洗新床單就直接鋪嚟瞓，加上流汗導致嚴重甩色，結果成個人被「藍染」。真相大白後，湯米自言「尷尬到死」，但醫護人員就笑到停唔低，仲話急症室平時好少咁歡樂。湯米返家後足足沖咗幾次涼先恢復「人色」，佢無奈表示：「以後新嘢一定要洗咗先敢用！」