綜合外媒報導，中東戰火打到依家都未停，令今屆由美、加、墨三國合辦嘅世界盃蒙上陰影，外界最關注嘅係：仲同美國打緊仗嘅伊朗，到底仲有冇得踢？國際足協（FIFA）主席恩芬天奴（Gianni Infantino）11 號就喺 Instagram 幫「老友」特朗普（Donald Trump）傳聖旨，話侵侵喺會議入面重申，美國絕對「歡迎」伊朗隊嚟踢世界盃。
呢次係恩芬天奴首次開口承認中東開緊戰。講起佢同特朗普嘅關係，真係「好到不得了」，恩芬天奴舊年 12 月先至巧立名目整咗個「FIFA 和平獎」頒畀特朗普，之後仲特登飛去美國出席人哋嘅就職典禮。今次佢喺 IG 發文，話雙方開會討論世界盃籌備工作時，特別傾到伊朗局勢，恩芬天奴指特朗普已開綠燈，表示美國大門依然為伊朗國家隊而開。不過，呢番「歡迎論」就同特朗普本人之前嘅講法「鬧雙胞」。事關特朗普上星期接受媒體訪問時，被問到伊朗參賽問題，佢當時直截了當話：「我真係一啲都唔在乎（I really don’t care）」伊朗踢唔踢。依家恩芬天奴突然幫佢「大方」表態，到底是美伊關係有轉機，定係恩芬天奴自己「捉錯用神」想幫侵侵洗底？