綜合外媒報導，泰國交通部證實，一艘泰國散貨船「Mayuree Naree」號11日喺全球能源命脈荷姆茲海峽（Strait of Hormuz）突然遭到不明飛彈攻擊。據報飛彈直接命中船尾，現場隨即發生劇烈爆炸並引發大火，引擎室瞬間陷入火海，情況極度危急。
事發後，船上 20 名船員眼見火勢失控，被迫棄船登上救生艇逃生，最終由阿曼海軍及時趕抵現場救起，暫時脫離險境。不過，最令人揪心嘅係，當時正喺船尾工作嘅 3 名船員喺爆炸後「下落不明」，目前搜救行動仍在進行中，但恐怕凶多吉少。「Mayuree Naree」號中彈後冒出滾滾濃煙，船尾清楚見到「BANGKOK」字樣，標記住呢艘船嘅身份。隨住伊朗同美以雙方火藥味愈嚟愈濃，呢條承載全球兩成原油嘅黃金航道已經變成人人自危嘅「死亡走廊」，今次泰國貨船受襲，再次反映遠方戰火已經實質威脅到亞洲嘅航運安全。