綜合中媒報導，武漢頂尖嘅「三甲」醫院同濟醫院竟然爆出「離晒大譜」嘅醫療事故。一名唐姓男子早前因為頸痛，凌晨去醫院做核磁共振（MRI）檢查，點知入咗部機之後，竟然被醫護人員徹底遺忘，喺狹窄、黑暗兼機器聲隆隆嘅檢查艙入面「人間蒸發」咗足足 6 小時！唐先生上月底凌晨做檢查，當時佢嘅頭部被固定仲戴埋面罩。按規定佢無帶電話入去，點知放射科值班醫護疑似「趕住去忙第啲嘢」，喺程序上標註咗「已完成」就直接走咗去，無將病人拉返出嚟，亦無交更。
唐先生憶述當時簡直係人生最絕望嘅時刻：「機器一直響，我覺得時間過咗好耐。」佢喺入面瘋狂大叫「有無人呀？」、「醫生喺唔喺度？」，但始終無人應機。佢想掙扎爬出嚟，但又驚亂郁會被機器整親，結果只能夠重複「嗌到攰就休息、恢復體力再嗌過」嘅絕望循環。
直到第日清晨 6 點幾，清潔工入去打掃先聽到呼救聲，搵埋保安先救返佢出嚟。當時唐太太因為搵唔到老公，經已趕到醫院兼報警。離奇嘅係，保安同警方講紀錄顯示唐先生一早做完檢查走咗，直到唐先生重獲天日拎返電話，太太先知佢一直被「活埋」喺醫院入面。同濟醫院13日發通報認錯，承認值班人員嚴重違反紀律，目前已將涉事醫護停職。