綜合外媒報導，日本熊本市中央區 12 日晚驚現現實版「Ghost Rider」！一輛喺當地相當有名嘅「移動烤番薯車」喺行駛途中突然起火，但 70 多歲嘅司機大叔並無停車，反而決定「直搗黃龍」，一路保持起火狀態狂飆去最近嘅消防署求救，嚇到沿途司機同路人個心離一離。
事發喺當晚約 9 時 50 分，多名市民報案指國道 3 號有一輛貨車「一邊燒一邊行」。當時呢架烤番薯車嘅車斗經已冒出濃煙同火焰，因為高溫融化嘅零件仲一粒粒跌喺路面，形成一條火痕。有目擊者形容，當時見到架車喺後面高速接近，仲不斷瘋狂撳喇叭，車身火光清晰可見，場面非常驚險。
最後呢架「火車」順利抵達熊本市西消防署，消防員見狀立即展開滅火，約 1 小時後成功救熄。可惜架車嘅車斗位置經已燒到剩返骨架，好彩駕駛艙仲大致完整，司機亦無受傷。據悉，呢架裝飾醒目嘅車喺當地薄有名氣，點知今次竟然變咗名副其實嘅「火燒番薯」。雖然司機大叔「親自送貨（火）」去消防局嘅做法好有諗頭，但日本汽車聯盟（JAF）就隨即發出警告，指呢種做法極度危險。因為行車時風速會令火勢蔓延得更勁，隨時會引爆油缸或者波及其他車輛，正確做法應該係立即停車、撤離並報警。