綜合外媒報導，如果你發現自己個辦公位成日有無故出現嘅「毛髮」，千祈唔好以為係清潔工偷懶，隨時係有人惡意為之，南韓仁川近日爆出一宗極度惡劣嘅職場騷擾案。一名 50 多歲嘅男高層，被揭發長期喺一名女下屬嘅辦公桌、滑鼠甚至制服袋入面灑下不明「體毛」。受害女子因為頂唔順，決定自掏腰包裝攝錄機，點知拍到嘅畫面令佢當場崩潰。
根據閉路電視畫面，呢位高層每日竟然特登提早 10 分鐘返公司，趁無人嗰陣行埋去女下屬個位，將體毛灑喺桌面同電腦上面，仲要用手喺對方個滑鼠度反覆摩擦，疑似想沾染更多異物。受害人指控，自去年 8 月起就飽受呢種「毛骨悚然」嘅折磨，甚至連制服袋入面都隨手夾到毛髮，感到極大羞辱。
最令人憤怒嘅係呢位高層嘅態度。當真相大白後，佢竟然對公司辯稱「唔知點解會咁做」，隨後仲想厚臉皮申請離職攞失業金，仲想用 300 萬韓元「慰問金」私了。受害者痛批對方毫無誠意，直斥：「我也是別人的女兒，你女兒遇到這種事能原諒嗎？」雖然受害者以性暴力、跟蹤騷擾等四項罪名提告，但南韓警方調查後竟然話「灑體毛」唔符合性暴力同跟蹤法嘅法律要件，最後竟然只係用「毀損財物罪」將個案移送。受害者對呢種「輕判」極度不滿，經已正式申請重新調查，誓要討回公道。