綜合外媒報導，澳洲塔斯曼尼亞州（Tasmania）荷巴特機場（Hobart Airport）近日一隻野生刷尾負鼠（Brushtail Possum）懷疑因為機場正進行擴建工程「蕩失路」，竟然潛入咗離境大堂嘅禮品店，仲搵到個絕佳嘅藏身點，竟然係混入一堆毛公仔入面「玩 Cosplay」！
最先發現呢位「隱世高手」嘅係一名行緊街嘅旅客，佢發現其中一隻「公仔」對眼竟然識郁，嚇到即刻話畀店員聽。店長布魯斐德（Liam Bloomfield）笑言，佢哋一直都知道自家出品嘅毛公仔做工精細、栩栩如生，但估唔到今次竟然獲得大自然嘅「最終認證」。呢隻負鼠靜靜雞坐喺袋鼠同塔斯曼尼亞惡魔公仔中間，無論係神態定顏色都「完美融入」。雖然呢位「地膽訪客」表現得非常淡定，似乎好享受呢個舒適嘅休息站，但機場方面為咗安全起見，最後都係派人將佢「護送」出機場。發言人幽默地表示，呢種「驚喜」真係只有喺澳洲、只有喺荷巴特機場先會發生。