綜合外媒報導，日本一名網民「保護猫ラオと不器用男。」22 日喺 X 平台分享咗一份超窩心嘅禮物。佢曬出一張裝喺透明膠袋、被精心摺疊過嘅「一億圓」紙幣，上面仲寫住：「呢度有一億（日圓），拎去買啲好嘢食、打起精神啦！！」
其實呢份「一億圓」只係由兩張 1 萬日圓紙幣巧妙摺疊而成，係媽媽充滿幽默感嘅小惡作劇。樓主表示，雖然實際金額同「一億」差好遠，但媽媽嗰份毫無保留嘅愛同鼓勵，令佢感動到不得了。呢張相短短半日就吸引咗超過 580 萬次瀏覽， 25 萬人齊齊畀「心心」。有醒目網民指出，呢種摺紙方式喺日本有一種說法：將咁樣摺嘅錢放入銀包，就會得到「永遠唔會缺錢」嘅祝福，簡直係最強護身符！不過亦有「現實派」網友指如果真係收到一億圓，樓主可能會被稅務署盯上，要交成五千萬日圓嘅「贈與稅」，到時真係「打唔起精神」。