綜合外媒報導，哥倫比亞一架載有 125 人嘅 C-130 力士型運輸機，23 日清晨喺南部萊吉薩莫港（Puerto Leguizamo）起飛後隨即失控墜毀。最新消息指，死亡人數已大幅上升至最少 66 人，當中包括 58 名士兵、6 名空軍同 2 名警察，現場飛機殘骸喺亞馬遜叢林入面劇烈燃燒，景象慘不忍睹。
呢單空難唔單止死傷慘重，仲引發咗哥國政壇嘅「大暴走」。總統裴卓（Gustavo Petro）喺網上曬出飛機墜落嘅驚險畫面，直斥係官僚體系阻住軍隊更新裝備。不過，軍事分析師薩梅特就唔係咁睇，佢反駁指呢架機啱啱先做完引擎大修，真正「攞命」嘅原因可能係政府大減國防預算，搞到機組人員飛行訓練時數不足，經驗變相「縮水」。最令人擔心嘅係，呢單經已係南美洲一個月內第二宗 C-130 重大事故。上個月玻利維亞先有一架運銀紙嘅同型貨機墜毀，依家又輪到哥國出事，令呢款軍事運輸機嘅安全性受到極大質疑。