綜合中媒報導，3 月 23 日，中國北京八達嶺長城北 8 樓同北 9 樓之間，發生一宗令人眼火爆嘅破壞古蹟案。兩名婦人竟然公然喺長城牆身「開山劈石」，用尖銳物件死命咁刻字，結果唔單止全國出名，仲要入去拘留所「留念」。
從微博瘋傳嘅影片可以見到，其中一名婦人表情猙獰、非常用力咁喺牆上面刮，另一名女子就喺隔離笑嘻嘻咁幫手拍片，完全唔覺得有問題。最後，牆上面留低咗「張 X 霞二姐妹留念」呢幾個大字，真係名副其實嘅「遺臭萬年」。延慶警方接報後行動迅速，根據《治安管理處罰法》將呢兩位「破壞王」行政拘留並處以罰款。警方強調，八達嶺長城係世界文化遺產，任何毀損行為都會依法偵辦。