綜合外媒報導，3月28 日係曼谷恰圖恰區大樓倒塌慘劇一週年。舊年緬甸發生 7.7 級強震，全曼谷竟然得呢棟接近完工嘅「泰國國家審計署」大樓倒塌，導致 95 人死亡。呢棟大樓由中國中鐵十局承建，本來係想展現「廉潔形象」，點知一震即碎，變成泰國史上最醜陋嘅制度失敗標誌。
最令泰國人「火滾」嘅係，慘劇過咗一年，雖然有 23 間私人公司同高層被起訴，但政府官員竟然「一個都無事」！泰國反貪組織 ACT 主席馬納（Mana Nimitmongkol）開火怒轟，指調查報告至今仲係「遮遮掩掩」，完全無清晰嘅問責機制。明明審計署自己都承認設計同施工有缺陷，但講到要法辦官員，就變咗「得個講字」。對於罹難者家屬嚟講，賠償金根本係「買唔返條命」。其中一位媽媽帕尤，佢 17 歲嘅仔為咗幫補家計，趁暑假去打工，結果一去不返。雖然佢攞到 300 萬泰銖嘅賠償，但佢心碎咁講：「我只係想個仔返嚟。」更令人心寒嘅係，國家審計署由頭到尾都無向家屬講過一句對唔住。