綜合外媒報導，美國財政部 26 日宣布，為咗紀念美國獨立 250 週年，未來嘅美鈔將會直接印上總統特朗普（Donald Trump）嘅親筆簽名。呢個舉動唔單止係美國史上第一次有「在任總統」簽名出現在貨幣上面，仲要順手廢除咗由 1861 年開始、足足 165 年嘅財政官簽名傳統！
財政部長貝森特（Scott Bessent）形容，呢個係彰顯特朗普任內經濟強勁、金融穩定嘅「最好方式」。佢話無嘢比喺美鈔印上特朗普個名更能代表美國嘅歷史成就。首批印有特朗普簽名嘅 100 美元大鈔預計 6 月就會出爐，之後其他面額都會陸續跟進。雖然鈔票設計大體不變，但「財政官」呢個職位嘅簽名正式成為歷史。其實呢次「美鈔簽名」只係特朗普政府一系列「名留青史」行動嘅其中一環。之前佢經已將甘迺迪中心改名做「特朗普—甘迺迪中心」，仲推出咗印有佢肖像嘅紀念金幣。根據法律，美鈔上面唔可以印生存緊嘅人嘅肖像，但印「名」就無人阻到。財政部擁有極大嘅設計裁量權，只要仲有「In God We Trust」呢句說話，特朗普想點簽都得。