綜合外媒報導，隨住美國同以色列對伊朗嘅戰爭進入第二個月，教宗良十四世（Pope Leo XIV）喺梵蒂岡聖伯多祿廣場發表咗一場震撼全球嘅演說。面對數萬名信眾，佢一改平時謹言慎行嘅風格，異常嚴厲咁警告嗰班發動戰爭嘅政客：你哋對手沾滿咗血，天主係絕對唔會聽你哋嘅祈禱！
良十四世喺聖枝主日（Palm Sunday）明確指出，耶穌係「和平之王」，任何人都唔可以利用祂嘅名義去將戰爭合理化。佢仲引用咗聖經經文，非常直接咁話：「就算你哋多多祈禱，我（天主）都唔會聽；因為你哋嘅手沾滿咗血。」雖然佢無直接點名邊個國家，但明顯係對緊近排不斷用宗教術語為戰爭辯護嘅美國官員「開大火」。自從 2 月 28 日美以聯合空襲伊朗引發大戰之後，良十四世對戰事嘅批評越嚟越硬。今次佢選擇喺咁重要嘅宗教節日發聲，擺明係要同嗰班打住宗教旗號行軍事之實嘅領袖「劃清界線」。佢強調，任何利用耶穌來合理化戰爭嘅行為，都係對信仰嘅背叛。