綜合中媒報導，內地演員張凌赫主演嘅古裝劇《逐玉》，可能會覺得佢飾演嘅將軍謝征帥氣逼人，但對於內地官媒嚟講，呢種「精緻」簡直係眼中釘！最近，呢位皮膚白皙、甲冑華麗嘅「將軍」竟然被戲稱為「粉底液將軍」，仲引發咗包括解放軍媒體平台「鈞正平」在內嘅多方官媒集體炮轟，直言呢種濃妝艷抹嘅形象完全無「陽剛之氣」，教壞細路！
呢場爭議背後其實「來頭唔細」。有分析指出，「鈞正平」諧音「軍政評」，代表嘅係軍方最高立場；而首先發炮嘅「浙江宣傳」背後更有中宣部副部長坐鎮。據聞呢次點名批評係代表咗「高層旨意」，反映出最高領導層對影視圈「飯圈亂象」同「娘炮文化」嘅極度不滿。雖然張凌赫嘅粉絲最初試圖「反擊」叫評論員管得太寬，但當意識到對方背景咁強硬之後，紛紛嚇到「即刻收聲」兼刪評，深怕連累偶像。其實呢場被稱為「掃娘風暴」嘅行動由 2021 年經已開始，政府一直想改革體育教育，培養學生嘅陽剛氣概。點知搞咗 5 年，呢類「精緻美男」依然係市場主流，官媒唯有再次重拳出擊。